Come home beta, come home quick!

Come home beta, come home quick!
November 20, 2014 at 8:01pm
Come home beta, come home quick!

Come home Beta, come home quick! 
Plenty plenty rain fall
Abby yard look like creek
Me an’ yuh pickney, fetch up wah we could
When abby haise up ah bed, abby see Sandra baifren
he deh lie down like he dead
He suh shame, he put he buckta pan he head
The only ting alive, ah watch we with one eye
Dah lil fine bai, ah wuk with Toolsie
All me can seh, is me see nuff granpickney!

Come home Buddy, come home quick!
Bring something fuh bail out with
Abby toilet overflowing with shit
Me call Yuh good fren Georgie ,fuh come an’ help
But he miss ah road, an’ drive inna trench
Me ah call yuh cellphone , yuh nah hansah
Like yuh deh under bed hide or wha?


Come home Darlin’ ,come home quick
Me ah call yuh good fren’ Carkball
He seh yuh deh wid he, but yuh can’t talk atall
Me know ah lie, yuh can never shut up
You ah talk, like parliament yuh deh
Neh even Donald can provoke you
when yuh deh pan form
So wha eva yuh deh Hubby, come home quick

Come Home Beta, come home quick!
Rain ah wash way abby new fridge
Georgie ah cry ‘bout he mini-bus
Gardan Mosley put am pan ah dam
Da lil bai still ah play dead
This house need a man, fuh gi' he two lick
The Country need a pump, fuh turn on quick

Come home Buddy, come home quick